సెక్స్ స్కాముల తుఫానులో క‌ర్ణాట‌క‌!

గ‌త రెండు మూడు నెల‌లుగా క‌ర్ణాట‌క రాష్ట్రం సెక్స్ స్కాముల వార్త‌ల‌తో నిలుస్తూ ఉంది. మాజీ ప్ర‌ధాని దేవేగౌడ మ‌న‌వ‌డు, జేడీఎస్ మాజీ ఎంపీ ప్ర‌జ్వ‌ల్ రేవ‌ణ్ణ వ్య‌వ‌హారం ముందుగా దుమారం రేపింది! ప్ర‌జ్వ‌ల్ రేవ‌ణ్ణ కొన్ని వంద‌ల మంది మ‌హిళ‌ల‌తో ర‌మిస్తూ వీడియోల‌ను చిత్రీక‌రించుకున్నాడ‌నే వార్త‌లు వ‌చ్చాయి. అందుకు స‌బంధించిన వీడియోల‌ను ఆయ‌న పెన్ డ్రైవ్ లో దాచి పెట్టుకుని ఉండ‌టం, ఆ పెన్ డ్రైవ్ వెలుగు చూడ‌టంతో దానిపై కేసులు న‌మోదయ్యాయి. అప్ప‌టికి హోదాలో అలా ప్ర‌జ్వ‌ల్ రేవ‌ణ్ణ అకృత్యాలు దుమారం రేపాయి. దానిపై కేసుల్లో అరెస్టుకు ముందు ప్ర‌జ్వ‌ల్ జ‌ర్మ‌నీకి ప‌రారు అయ్యాడు.

2024 ఎన్నిక‌ల్లో హ‌స‌న్ నుంచినే ఎంపీగా పోటీలో ఉండిన ప్ర‌జ్వ‌ల్ పోలింగ్ పూర్తి కాగానే ప‌రార్ అయ్యాడు. మ‌ళ్లీ రిజ‌ల్ట్స్ విడుద‌ల వ‌ర‌కూ ఆయ‌న ఇండియా రాలేదు. దీంతో ఆయ‌న వ్య‌వ‌హారం స‌ర్వ‌త్రా చ‌ర్చ‌నీయాంశంగా నిలిచింది. జేడీఎస్ తో బీజేపీ కూడా పొత్తులో ఉండ‌టంతో.. ఈ ఉదంతం ఎన్డీయే ఎంపీ అభ్య‌ర్థిదిగా మారింది. జాతీయ స్థాయిలో చ‌ర్చ‌లో నిలిచింది. ప్ర‌త్యేకించి ప్ర‌జ్వ‌ల్ అలా వీడియోల‌ను దాచి ఉంచ‌డం పైత్య‌కారానికి నిద‌ర్శ‌నంగా నిలిచింది. ప్ర‌స్తుతం ప్ర‌జ్వ‌ల్ బెంగ‌ళూరులోని జైల్లో ఉన్నాడు. ఇదే కేసులో ఆయ‌న తండ్రి, త‌ల్లి కూడా విచార‌ణ‌ను ఎదుర్కొంటూ ఉండ‌టం గ‌మ‌నార్హం!

ప్ర‌జ్వ‌ల్ అంకుల్ కుమార‌స్వామి ఇటీవ‌లే మోడీ కేబినెట్ లో మంత్రిగా ప్రమాణ స్వీకారం చేశాడు. మ‌రి ప్ర‌జ్వ‌ల్ ఉదంతం ఎక్క‌డికి వెళ్తుందో అనే చ‌ర్చ జ‌రుగుతూ ఉండగానే.. అంత‌కు మించిన సంచ‌ల‌న సెక్స్ స్కామ్ వెలుగులోకి వ‌చ్చింది అదే క‌ర్ణాట‌క‌లో!

క‌న్న‌డ స్టార్ హీరో ద‌ర్శ‌న్ త‌న అభిమాని ఒక‌డిని హ‌త్య చేయించిన వ్య‌వ‌హారం పెను సంచ‌ల‌నంగా మారింది. గ‌తంలో సినిమా హీరోలు ఇలాంటి వివాదాల్లో చిక్కుకోవ‌డం జ‌రిగింది. తెలుగు స్టార్ హీరో బాల‌కృష్ణ ఇంట్లో కాల్పుల ఉదంతం అప్ప‌ట్లో దుమారం రేపింది. తన ఇంట్లోనే బాల‌కృష్ణ నిర్మాత బెల్లంకొండ సురేష్ పై కాల్పులు జ‌ర‌ప‌డం సంచ‌ల‌నంగా నిలిచింది. అయితే బాల‌కృష్ణ అప్ప‌ట్లో త‌న మ‌తిస్థిమితం స‌రిగా లేద‌ని త‌ప్పించుకున్న‌ట్టుగా వార్త‌లు వ‌చ్చాయి. ఆ త‌ర్వాత మ‌ల‌యాళీ స్టార్ హీరో దిలీప్ కూడా త‌న‌కు త‌ల‌నొప్పిని తెచ్చిపెట్టిన ఒక హీరోయిన్ పై అకృత్యానికి పాల్ప‌డించాడ‌నే ఆరోప‌ణ‌లు వ‌చ్చాయి.

దిలీప్ చాన్నాళ్లు పాటు జైల్లో ఉండి బ‌య‌ట‌కు వ‌చ్చాడు, కేసు విచార‌ణ కొన‌సాగుతూ ఉంది. ఇప్పుడు ద‌ర్శ‌న్ వంతు. తన స‌న్నిహితురాలిని మెసేజ్ ల‌తో వేధిస్తున్నాడ‌నే మిష‌తో త‌న అభిమానిని ద‌ర్శ‌న్ ద‌గ్గ‌రుండి హ‌త్య చేయించాడ‌నే కేసు న‌మోదు అయ్యింది. చాలా ప‌టిష్ట‌మైన ఆధారాల‌తో ద‌ర్శ‌న్ దొరికిపోయాడ‌ని పోలీసులు చెబుతున్నారు. దీంతో ఆయ‌న‌ను అరెస్టు చేశారు. ఇప్పుడ‌ప్పుడే బ‌య‌ట‌కు వ‌చ్చే అవ‌కాశాలు ద‌ర్శ‌న్ కు లేన‌ట్టుగా ఉన్నాయి.

ద‌ర్శ‌న్ తీరుకు తోడు అత‌డి వీరాభిమానుల అతి మ‌రింత ఓవ‌ర్ గా ఉంది. ద‌ర్శ‌న్ ను అరెస్టు చేయ‌నే వ‌ద్ద‌ని, అత‌డి త‌ప్పేం లేదంటూ ఆయ‌న వీరాభిమానులు ఓపెన్ గా వాదిస్తూ త‌మ మూర్ఖ‌త్వాన్ని చాటుకుంటూ ఉన్నారు. త‌మ అభిమాన హీరో ఎన్ని పెళ్లిళ్లు అయినా చేసుకోవ‌చ్చు, ఎన్ని కాపురాలు అయినా చేయొచ్చు, ఎవ‌రినైనా మ‌ర్డ‌ర్ చేయించొచ్చు అన్న‌ట్టుగా ఉంది సినిమా హీరోల వీరాభిమానుల మాన‌సిక ప‌రిస్థితి!

ఇదంతా ఇలా ఉండ‌గానే.. య‌డియూర‌ప్ప‌పై కూడా ఆరోప‌ణ‌లు గుప్పుమ‌న్నాయి. ముద‌స‌లిగా మారిన ఈ క‌ర్ణాట‌క మాజీ సీఎం ఒక మైన‌ర్ బాలిక‌పై లైంగికవేధింపుల‌కు పాల్ప‌డ్డాడు అనేది ఆరోప‌ణ‌. ఈ విష‌యంలో 17 యేళ్ల బాలిక త‌ల్లి పోలీసుల‌కు ఫిర్యాదు చేయ‌గా.. య‌డియూర‌ప్ప‌పై ఫోక్సో చ‌ట్టం కేసు న‌మోదు అయ్యింది. ఆయ‌న‌ను అరెస్టు చేయ‌వ‌ద్ద‌ని కోర్టు ఆదేశాలు ఇచ్చినా.. ఈ రాజ‌కీయ వృద్ధుడు, ఇటీవ‌లి లోక్ స‌భ ఎన్నిక‌ల సంద‌ర్భంలో కూడా క్రియాశీల‌కంగా ప‌ని చేశారు. ఇలాంటి నేప‌థ్యంలో.. ఆయ‌న వార్త‌లు కూడా దుమారం రేపుతున్నాయి!

ఒక మాజీ పీఎం మ‌న‌వ‌డు క‌మ్ ఒక మాజీ ఎంపీ, ఒక స్టార్ హీరో, ఇంకో మాజీ ముఖ్య‌మంత్రి ఇలా ముగ్గురూ సంచ‌ల‌నాత్మ‌క‌మైన సెక్స్ కేసుల్లో ఇరుక్కొని వార్త‌ల్లో నిలుస్తున్నారు. క‌ర్ణాట‌క మీడియాలో వీరి ముచ్చ‌ట్లే ప‌తాక శీర్షిక‌లుగా కొన‌సాగుతూ ఉన్నాయి. గ‌తంలోనూ ఇలాంటి స్కామ్ ల‌కు లోటు లేద‌క్క‌డ‌. అసెంబ్లీలో కొంత‌మంది బీజేపీ ఎమ్మెల్యేలు పోర్న్ చూడ‌టం, ఆ త‌ర్వాత మ‌రో ఎమ్మెల్యే ఒక యువ‌తితో లైంగిక చ‌ర్య‌ను వీడియోగా దుమారం రేప‌డం జ‌రిగింది. ఇప్పుడు అంత‌కు మించిన కేసులు అక్క‌డ వార్త‌ల్లో నిలుస్తున్నాయి.